Snehalay | स्नेहालयच्या ‘उमेद' तर्फे आय-कार्ड व साडी वाटप सोहळा उत्साहात साजरा

 घरेलू कामगार महिलांच्या सशक्तीकरणाचा नवा अध्याय  

नगर : दर्शक । 

सामाजिक परिवर्तनाच्या दिशेने वाटचाल करणाऱ्या स्नेहालय संस्थेच्या ‘उमेद प्रकल्पा’तर्फे आयोजित घरेलू कामगार महिलांच्या आय-कार्ड वितरण व दिवाळी निमित्ताने माहेरची साडी वाटप सोहळ्याचा उत्सवमय माहोल रहेमत सुलतान फाउंडेशन, अहिल्यानगर येथे पाहायला मिळाला.

या उपक्रमाद्वारे सेवावस्तीतील 108 एकल, विधवा, घटस्फोटित व गरजू महिलांना महाराष्ट्र राज्य घरेलू कामगार कल्याण मंडळाचे योजना अंतर्गत घरेलू कामगार ओळखपत्र तसेच दिवाळी निमित्त माहेरची साडी देऊन सन्मानित करण्यात आले.

या कार्यक्रमाला स्नेहालयच्या सचिव डॉ. प्रीती भोंबे, विश्वस्त राजीव गुजर, बालभवन मानद संचालिका वैशाली चोपडा व संचालक हनीफ शेख प्रमुख पाहुणे म्हणून उपस्थित होते.

“घरेलू कामगार कार्ड हे केवळ एक ओळखपत्र नाही तर- डॉ. प्रीती भोंबे म्हणाल्या,

“घरेलू कामगार कार्ड हे केवळ एक ओळखपत्र नाही, तर महिलांच्या अधिकारांचे आणि आत्मसन्मानाचे प्रतीक आहे. घरगुती कामगार हा असंघटित कामगार वर्ग असून त्यांना सामाजिक सुरक्षा कल्याणकारी योजना व अधिकाऱ्यांची संरक्षण देणे, या माध्यमातून महिलांना अन्याय आणि अत्याचारांविरुद्ध उभं राहण्याची ताकद मिळते.”

माननीय राजीव गुजर यांनी, या शासनाच्या योजनेतून सामाजिक सुरक्षा व विमा योजना, शिक्षण सहाय्यता योजना, विवाह सहाय्यता योजना, प्रशिक्षण व सक्षमीकरण आणि घरगुती कामगारांचे हक्काचे संरक्षण मिळणार आहे असे नमूद करून महिलांना पुढील वाटचालीसाठी शुभेच्छा देत आत्मनिर्भरतेचा संदेश दिला.

तर हनीफ शेख यांनी स्नेहालयच्या “सक्षमा” प्रकल्पांतर्गत सुरू असलेल्या बेडसाईट नर्सिंग, बाळंतीण आया व स्वच्छता कौशल्य प्रशिक्षणाबाबत माहिती देवून या प्रशिक्षणाचा फायदा आता या कष्टकरी महिलांनी घेऊन हे तांत्रिक शिक्षण प्रशिक्षण द्वारे आपल्या उपजीविकेत आर्थिक भर वाढवावी याबाबत मार्गदर्शन केले.

सखी सेंटरच्या समन्वयक शबाना शेख यांनी महिला व बालविकास विभागाच्या विविध सरकारी योजनांची माहिती देत महिलांना सक्रिय सहभागाचे आवाहन केले.

 “उमेद प्रकल्प” — महिलांच्या सशक्तीकरणासाठी नवा दीपस्तंभ

स्नेहालयचा ‘उमेद प्रकल्प’ हा सामाजिक न्याय व स्वावलंबनासाठी झटणारा उपक्रम असून एकल, विधवा, घटस्फोटित, निराधार व वंचित महिलांना आर्थिक स्थैर्य व आत्मसन्मान मिळवून देण्याचे ध्येय त्यामागे आहे.

मागील दहा महिन्यांत या प्रकल्पांतर्गत — ३०० गरजू महिलांचे सर्वेक्षण पूर्ण केले, १२५ महिलांना व्यावसायिक प्रशिक्षण दिले, गोधडी उद्योग सुरू करून घरबसल्या रोजगाराची संधी उपलब्ध करून दिली, 57 महिलांची बँक खाती उघडली, २४३ घरेलू कामगारांचे फॉर्म कामगार विभागाकडे सादर करण्यात आले, त्यापैकी ७६ कार्ड वाटप आज करण्यात आले.

 महिलांसाठी दिवाळीची “माहेरची भेट”

या सोहळ्याचा समारोप करताना आयोजकांनी सांगितले की,“हा आय-कार्ड वितरण सोहळा केवळ दस्तऐवजांचा कार्यक्रम नाही, तर सशक्तीकरणाचा उत्सव आहे. अहिल्यानगर शहरातील झोपडपट्ट्यांमध्ये स्नेहालय संचलित बालभवन प्रकल्पांद्वारे कष्टकरी महिलांसोबत रोजगार आणि आर्थिक उन्नतीसाठी ‘उमेद प्रकल्प’ कार्यरत आहे. जिल्हा कामगार कार्यालयाच्या सहकार्याने या महिलांना घरेलू कामगार कार्ड देत दिवाळीच्या निमित्ताने माहेरची साडी देणे हा एक भावनिक सन्मानाचा क्षण ठरला आहे.”

कार्यक्रमाचे प्रास्ताविक यास्मिन शेख यांनी केले, सूत्रसंचालन प्रतीक्षा साळवे यांनी तर आभार रुबीना शेख यांनी मानले.या उपक्रमाच्या यशस्वी आयोजनासाठी, कामगार अधिकारी संदीप पालवे, बाल भवन व्यवस्थापक उषा खोल्लम, निलोफर शेख, संतोष बेदरकर, सचिन वाघ व बालभवन टीम यांनी विशेष परिश्रम घेतले.