दिलीप निवृत्ती रोंगटे सर यांचा सेवापूर्ती गौरव सोहळा उत्साहात संपन्न

 प्राचार्य दिलीप रोंगटे सरांची ३५ वर्षांच्या ज्ञानयज्ञानी सांगता

नगर (प्रतिनिधी):

शिक्षण ही केवळ नोकरी नसून ती एक दीर्घ साधना आहे, हे आपल्या ३५ वर्षांच्या अविरत सेवेतून सिद्ध करणारे माध्यमिक व उच्च माध्यमिक विद्यालय, शेंडी (भंडारदरा) येथील आदर्श प्राचार्य  दिलीप निवृत्ती रोंगटे सर यांचा सेवापूर्ती गौरव सोहळा मोठ्या उत्साहात संपन्न झाला. याप्रसंगी रोंगटे सरांनी आपल्या वडिलांच्या स्मृती प्रीत्यर्थ विद्यालयाला ५० हजार रुपयांची देणगी सुपूर्द करून सामाजिक बांधीलकीचा एक नवा आदर्श निर्माण केला आहे.

         वडिलांच्या नावाचा शैक्षणिक वारसा

आपल्या निवृत्तीच्या क्षणी कृतज्ञता व्यक्त करताना प्राचार्य रोंगटे सर भावूक झाले होते. त्यांनी आपले वडील कै. निवृत्ती रूपा रोंगटे यांच्या स्मरणार्थ ५० हजार रुपयांची रक्कम संस्थेचे अध्यक्ष तथा कार्यक्रमाचे अध्यक्ष सुनील दातीर व सेक्रेटरी सुधाकरराव देशमुख यांच्याकडे सुपूर्द केली. या ठेवीतून येणाऱ्या व्याजाच्या रकमेतून दरवर्षी इयत्ता १० वी आणि १२ वी च्या परीक्षेत प्रथम येणाऱ्या गुणवंत विद्यार्थ्यांना पारितोषिक देण्यात येणार आहे.    

     ग्रामीण भागातील विद्यार्थ्यांना अभ्यासात जिद्द निर्माण व्हावी आणि त्यांनी 'पहिला' येण्याची प्रेरणा घ्यावी, हा या देणगीमागील मुख्य उद्देश असल्याचे सरांनी आवर्जून नमूद केले.

    ३५ वर्षांचा प्रेरणादायी प्रवास

कार्यक्रमादरम्यान सरांच्या शैक्षणिक प्रवासाचा गौरव करण्यात आला. अतिदुर्गम आदिवासी भागातील साम्रद येथे जन्मलेल्या रोंगटे सरांनी घाटघर आणि संगमनेर येथून आपले शिक्षण पूर्ण केले. १९९१ मध्ये अंभोळ विद्यालयातून सुरू झालेला हा प्रवास शेंडी विद्यालयाच्या कायापालटापर्यंत येऊन पोहोचला. २००६ पासून प्राचार्य पदाची धुरा सांभाळताना त्यांनी शाळेला भाड्याच्या खोलीतून बाहेर काढून लोकसहभागातून सुसज्ज अशा वर्गखोल्या आणि अत्याधुनिक प्रयोगशाळा मिळवून दिली.

मान्यवरांची उपस्थिती आणि गौरव

       या सोहळ्याला राजकीय, शैक्षणिक आणि सामाजिक क्षेत्रातील अनेक दिग्गज उपस्थित होते. संस्थेचे अध्यक्ष मा सुनील दातीर यांच्या अध्यक्षतेखाली कार्यक्रमाला मा. श्री. दिलीपराव भांगरे, मा. श्रीमती सुनिताताई भांगरे, मा. श्री. अमितदादा भांगरे, सेक्रेटरी सुधाकरराव देशमुख अकोले तालुका एज्युकेशन सोसायटीचे सदस्य सुधाकरराव आरोटे शरदराव देशमुख धनंजय संत उन्नती सेवा मंडळाचे भरत गाणे भंडारदरा मा.सरपंच पांडू शेठ खाडे, जितेंद्र भांगरे, 

शिक्षक भारती संघटनेचे विभागीय कार्याध्यक्ष महेश पाडेकर माध्यमिक शिक्षक सोसायटीच्या संचालक किशोर धुमाळ,सी. बी.भांगरे, कोंढार सर, भालेराव सर,यशवंत वरे, चंदर बांडे, विठ्ठल भांगरे, सुनील जाधव, प्राचार्य सुनील पंडित, प्राचार्य सुनील धुमाळ, प्राचार्य अभय वाघ, संजय डगळे, प्राचार्य काशिनाथ तळपाडे, रामनाथ आरोटे, अंकुश भोईर, हिरामण झडे,युवराज पाडेकर, सिताराम पाटील, झडे लक्ष्मण, भरत भांगरे,एकनाथ महाराज भांगरे, रोंगटे सरांच्या कुटुंबातील सर्व सदस्य व अनेक क्षेत्रातील अनेक मान्यवर उपस्थित होते.सर्वांनीच रोंगटे सरांच्या प्रशासकीय कौशल्याचे आणि सकारात्मक वृत्तीचे कौतुक केले.

      विद्यार्थी आणि सहकाऱ्यांतून कृतज्ञता

कार्यक्रमाच्या शेवटी, विद्यालयाचे शिक्षक, शिक्षकेतर कर्मचारी, माजी विद्यार्थी आणि ग्रामस्थांच्या वतीने रोंगटे सरांचा यथोचित सत्कार करण्यात आला. "सरांनी लावलेले हे शैक्षणिक रोपटे आता एका विशाल वटवृक्षाचे रूप धारण करून हजारो विद्यार्थ्यांना सावली देत आहे," अशा शब्दांत त्यांच्या कार्याचा गौरव करण्यात आला.

      आपल्या निवृत्तीनंतरचे आयुष्य सुख-समाधानाचे आणि आरोग्यदायी जावो, अशा शुभेच्छा उपस्थित सर्व ग्रामस्थ आणि विद्यार्थी वर्गाकडून देण्यात आल्या.