"ज्येष्ठ मानसोपचारतज्ज्ञ डॉ. आनंद नाडकर्णी यांना 'मानसग्राम' परिवारातर्फे भावपूर्ण श्रद्धांजली" 










नगर : दर्शक । 

मानसशास्त्र अत्यंत सोप्या भाषेत मांडून सर्वसामान्यांना मनाचा अभ्यास करायला शिकवणारे महाराष्ट्राचे सुप्रसिद्ध मानसोपचारतज्ज्ञ डॉ. आनंद नाडकर्णी यांच्या निधनाने महाराष्ट्राच्या वैचारिक आणि वैद्यकीय क्षेत्राची कधीही न भरून निघणारी हानी झाली आहे. त्यांच्या निधनानंतर स्नेहालय संचलित 'मानसग्राम' प्रकल्पाच्या वतीने शोक सभेचे आयोजन करण्यात आले होते. या सभेत डॉ. नाडकर्णी यांच्या कार्याला उजाळा देत त्यांना भावपूर्ण श्रद्धांजली अर्पण करण्यात आली.



 मार्गदर्शक आणि शिल्पकार 


स्नेहालयच्या 'मानसग्राम' प्रकल्पाची उभारणी करण्यात डॉ. आनंद नाडकर्णी यांचा मोलाचा वाटा होता. मानसग्रामची इमारत कशी असावी, मानसिक रुग्णांशी संवाद कसा साधावा आणि उपचारांची दिशा काय असावी, याबाबत त्यांनी मोलाचे मार्गदर्शन केले होते. त्यांच्या व्यस्त वेळापत्रकातून वेळ काढून त्यांनी स्नेहालयच्या टीमला ठाणे येथे दोन तास विशेष मार्गदर्शन दिले होते. त्यांच्या जाण्याने मानसग्रामने आपला एक मार्गदर्शक आणि शिल्पकार गमावला असल्याची भावना यावेळी व्यक्त करण्यात आली.


 शोक सभेचे आयोजन 


मानसग्राम प्रकल्पाच्या माध्यमातून डॉ. नीरज करंदीकर, सौ. दीप्ती करंदीकर, डॉ. तेजस्विनी मिस्किन, डॉ. तेजस्विनी सोनवणे, डॉ. मेघना मराठे आणि संपूर्ण स्नेहालय परिवारातर्फे ही शोक सभा आयोजित केली होती. यावेळी बोलताना प्रकल्प समन्वयक रमाकांत दोड्डी यांनी डॉ. नाडकर्णी सरांच्या कार्याची माहिती देऊन त्यांच्या योगदानाबद्दल कृतज्ञता व्यक्त केली.

"डॉ. नाडकर्णी सरांनी केवळ उपचार केले नाहीत, तर समाजाला मानसिक आरोग्याकडे बघण्याचा एक नवा दृष्टिकोन दिला. मानसग्रामची उभारणी करताना त्यांनी दिलेले सल्ले आजही आमच्यासाठी दीपस्तंभासारखे आहेत."


स्नेहालय परिवारातील सदस्य मोठ्या संख्येने उपस्थित


या शोक सभेस मानसग्राम प्रकल्पातील सर्व कर्मचारी आणि स्नेहालय परिवारातील सदस्य मोठ्या संख्येने उपस्थित होते. "ईश्वर त्यांच्या आत्म्यास चिरशांती देवो आणि त्यांच्या कुटुंबियांना या कठीण प्रसंगातून सावरण्याची शक्ती देवो," अशी प्रार्थना यावेळी करण्यात आली.