सुनीता लोंढे यांची संशोधनातून मानाची झेप

 मराठी विषयात विद्यावाचस्पती (पीएच.डी.) पदवी; साहित्य संशोधन क्षेत्रात उल्लेखनीय कामगिरी

नगर : दर्शक । 

अनुकूल कम्प्युटरच्या संचालिका तथा शिक्षण क्षेत्रात कार्यरत असलेल्या सुनीता मुकुंद लोंढे यांनी मराठी साहित्य संशोधन क्षेत्रात उल्लेखनीय यश संपादन करत सावित्रीबाई फुले पुणे विद्यापीठाची विद्यावाचस्पती (पीएच.डी.) पदवी प्राप्त केली आहे. विद्यापीठाकडून पदवी जाहीर झाल्याचे अधिकृत पत्र नुकतेच त्यांना प्राप्त झाले असून, त्यांच्या या यशामुळे शैक्षणिक, साहित्यिक आणि सामाजिक क्षेत्रातून त्यांच्यावर अभिनंदनाचा वर्षाव होत आहे.

            सुनीता लोंढे यांनी अहिल्यानगर येथील पेमराज सारडा महाविद्यालयाच्या मराठी विभागातील प्रा. डॉ. माहेश्वरी वीरसिंग गावीत यांच्या मार्गदर्शनाखाली 'गुलबर्गा (कर्नाटक) येथील अनुबंध नियतकालिकातील कथांचा विवेचक अभ्यास' या विषयावर संशोधन प्रबंध सादर केला. मराठी साहित्याच्या अभ्यासात महत्त्वाचे स्थान असलेल्या या संशोधनातून अनुबंध नियतकालिकात प्रकाशित कथांमधील आशय, कथनशैली, साहित्यिक मूल्ये, सामाजिक वास्तव, मानवी संवेदना आणि बदलत्या सामाजिक परिस्थितीचे प्रतिबिंब यांचा चिकित्सक व सखोल अभ्यास करण्यात आला आहे.

           या संशोधनामुळे मराठी कथासाहित्यातील एका महत्त्वपूर्ण नियतकालिकाच्या साहित्यिक योगदानाचे शास्त्रीय मूल्यमापन होण्यास मदत झाली असून, संशोधन क्षेत्रात हा अभ्यास उपयुक्त संदर्भग्रंथ ठरेल, अशी अपेक्षा व्यक्त केली जात आहे. साहित्य अभ्यासक, संशोधक आणि विद्यार्थ्यांसाठीही हे संशोधन दिशादर्शक ठरणार असल्याचे मत जाणकारांनी व्यक्त केले आहे.

           संगणक शिक्षण क्षेत्रात गेली अनेक वर्षे कार्यरत असलेल्या सुनीता लोंढे या अनुकूल कम्प्युटरच्या माध्यमातून शेकडो विद्यार्थ्यांना संगणक शिक्षणाचे मार्गदर्शन करत आहेत. शिक्षण क्षेत्रातील सक्रिय योगदानासोबतच त्यांनी संशोधन क्षेत्रातही सातत्यपूर्ण परिश्रम घेत उच्च शैक्षणिक यश संपादन केले आहे. त्यामुळे त्यांच्या या यशामुळे संस्थेच्या शैक्षणिक कार्यालाही नवी ओळख आणि प्रेरणा मिळाली आहे.

            सुनीता लोंढे यांच्या या उल्लेखनीय यशाबद्दल शैक्षणिक संस्था, साहित्यिक, संशोधक, सामाजिक क्षेत्रातील मान्यवर, विद्यार्थी तसेच हितचिंतकांनी त्यांचे अभिनंदन करून पुढील वाटचालीस शुभेच्छा दिल्या आहेत. त्यांच्या या यशामुळे अहिल्यानगरच्या शैक्षणिक क्षेत्राच्या शिरपेचात आणखी एक मानाचा तुरा खोवला गेला आहे.